جربت بالدنيـا تجاريـب شايـب
وعرفت عدواني وميزت الأصحاب
وعرفت طبع الناس مخطي وصايب
ومانيب خبل تخدعه ضحكة النـاب
جنبت ناس اوناس بعضه قرايـب
البعض منهم قربته قربـت الـداب
لو كان تعطيهم عيونـك وهايـب
ماينفعونك جودهم عنـد الأجنـاب
ومن لا يسد اللازمة في النوايـب
وقت الرخا تقول أبو زيـد وذيـاب
واللي تكبر عنـه شـد الركايـب
اترك طريقة واحقره كنـه ذبـاب
وبعض البشر قلبه من الحقد عايب
لافيه طب وقلبه اسود من غـراب
عنده نجاحك من كبار المصايـب
وإذا سمع مدحك من الغيظ ينصاب
لولا الحيا سالت دموعه سكايـب
مسكين من نار الحسد ماكل تراب
اللي يذمك كل ما صـرت غايـب
وان جيت قدم لك تراحيب وإعجاب
خله ترى مثله مع الناس خايـب
وعادات أبو وجهين يكذب ويغتاب
لو تغرقه بالطيب ما هـو بطايـب
ولا تنخدع في مثل شرواه لو طاب
طيبه وخيـره للمـره والنسايـب
ولا تنشده عن والدينه والاقـراب
لاهـو برجـال يفـك النشـايـب
ولاهو بنت تنقش الكف بخضـاب
وشلون نبي الغيث وايا السحايـب
والناس صارت بين حاسد وكـذاب
كثيرهـم تفـرغـوا للطـلايـب
و ما بينهم قامت عداوات وأحزاب
وتبقى الحقيقة يا زمان العجايـب
الروس روس ولو يغـارون(…)
هذه القصيدة لاخونا الشاعر عبدالله الثنيان (ابو محمد ) الطرماح الطائي
نسأل الله ان يدخله فسيح جناته