الشهيد اسدالجزيزة العربية واشباله

المعاناة

يا ليل خبرني عن أمر المعاناة
هي من صميم الذات ولا أجنبية

هي هاجس يسهر عيوني و لا بات
أو خفقة تجمح في قلبي عصية

هي صرخة تمردت فوق الأصوات
أو ونة وسط الضماير خفية

أو عبرة تعلقت بين نظرات
أو الدموع اللي تسابق همية

أعاني الساعة و أعاني مسافات
و أعاني رياح الزمان العتية

و أصور معاناتي حروف وأبيات
يلقى بها راعي الولع جاذبية

و لاني بندمان على كل ما فات
أخذت من حلو الزمان و رديه

هذي حياتي عشتها كيف ما جات
آخذ من أيامي و أرد العطية

طال السفر


طال السفر والمنتظر مل صبره
والشوق يامحبوب في ناظري شاب
رد النظر خليت بالكف جمره
لهيبها في داخل القلب شباب
عز الخبر والمهتوي ضاق صدره
يامن يرد العلم عن هاك الاحباب
طيفه عبر ماارسل مع الطيف عذره
هو خاطره من لوعتي مابعد طاب
هو ما ذكر ان الجفا فيه كسره
للخافق الي من هوى صاحبه ذاب
ياما سهر طرفي على حبس عبره
أردها والوجد للدمع جذاب
دمعي انحدر جاله على المنع جسره
عظيم وجدي للدمع شرع الباب
يوم وشهر عزاه والعمر مره
والناس واجد لكن الولف غلاب

سايق الخير

سايق الخير ساقك يم عاشق جمالك
لو تأخرت باصبر لو هي ألفين عام

أسفرت وأنورت من يوم شعشع هلالك
فز قـلبي لـفزّك يا ظـبي العـدام

أنزل القلب وأمر ما به الا حلالك
أشـهد انه حظيظ اللي غدالك مقام

ما يسد بمكانك غيرك أحد ٍ بدالـك
باني ٍ لك قصـور و باني ٍ لك خـيام

عقب رمضاء زماني جيت أدور ظلالك
بل ريقـي بقربك عقب طول الصـيام

كل شـي تبـسـم يـوم لامـس دلالـك
وكـل نار ٍ كوتني مـنك صـارت سـلام ..!!

ياضايق الصدر بالله

يا ضايق الصدر بالله وسع الخاطر

دنياك يازين ما تستاهل الضيقه

الله على ما يفرج كربتك قادر

والله له الحكم في دبرة مخاليقه

حلو العيون استهانت دمعها الحادر

كف العباير حزين الدمع ما طيقه

حسايف الحزن يغشى وجهك الطاهر

والورد في وجنتك حرام تغريقه

يفداك قلب على ما تشتهي حاضر

يفداك باللي بقى لي من معاليقه

ما فات خله ولا تهتم من باكر

وأغنم من اليوم ما ساقت توافيقه

بشروني عنك

بشروني عنك ما يدرون عني
ما دروا باللي شغل فكري وظني

اتسمع للحكي بك واتحفظ
خايف دقات قلبي يفضحني

كل ما سموك باسمك فز قلبي
والضماير والمدامع شاغلني

يا حبيبي يوم جنبت الحبايب
عفت لجلك كل من قبلك فتني

من عرف قربك عرف طعم السعادة
وإن تشطرت أدرك غبون التمني

في هواك من العسل لذة مذاقه
لكن حروس النحل عنها حدني

ماعد اسمع بك ولا اوحي فيك عاذل
والعذارى جهل لو داعبني

لك عيون فعلها بي فعل ظالم
من عرفتك يالغضي ما ريحني

إن تفارقنا تغايا لي بليلي
وإن تقابلنا دهني واخجلني

كل مانسنس

كل ما نسنس من الغربي هبوب حمل النسمه سلام
و إن لمحت سهيل في عرض الجنوب عانق رموز الغرام

لك حبيبن ما نسا .. كلمته دايم عسى
اطلب الله وارتجيه .. صبح يومي والمسا

كل زين اشاهده وانتم بعيد منوتي ليتك معي
و إن سهرت الليل اهوجس بك واعيد هل لاجلك مدمعي

وانت هاجس خاطري .. و انت فرحة ناظري
يا قريب و يا بعيد .. فيك امس وحاضري

نشوتك تلعب مع قطر المطر .. و انتشى قطره معك
والسحاب يطاردك بين الشجر .. خالق الزين ابدعك

الندى في وجنتك .. صار عطر بلمستك
و الهوا غنى طرب .. تستثيره بسمتك

كلما ضمت عيوني منك طيف .. يا بعد كل الطيوف
قلت ما مثلك على الدنيا وصيف .. لا حشا مالك وصوف

لا سحاب ولا مطر .. ولا نسيم ولا زهر
ولا طيور ولا غزال .. ولا مع باقي البشر

مجموعة انسان
قالت من انت وقلت مجموعة انسان ....
من كل ضد وضد تلقين فيني

فيني نهار وليل وافـراح واحـزان ....
أضحك ودمعي حاير وسط عـيني

وفيني بداية وقـت ونهاية ازمان ....
أشتاق باكر واعـطي امـسي حـنيـني

واسقي قلوب الناس عشق وظميان ....
واهدي حيارى الدرب واحتار ويني

واحاوم صــقور الهوا حوم نشوان ....
واســيل الوديان دمعٍ حــزيني

في عيني اليمنى من الورد بستان ....
وفي عيني اليسرى عـجاج السنيني

تهزمني النجـلا وانا نـد فرســان ....
واخفي طعوني والمحـبه تــبــين

ان ما عرفتـيـني فلاني بزعــلان ....
حـتى انـا تراني ... احـترت فـيني

غريب الدار

غريب الدار ومناي التـــــــــــــسلّي
اسلّي خاطري عن حب خلّي

ســـــــمعت الشور من قاصر معرفه
يحـــسب البعد عن داره يسلّي

أســــــــافر عنه من ديره لـــــــديره
عســــاي اسلاه لكن ما حصلّي

وأهوجس فيه وأنسى اني نسيته
وافكر في ليـــــــــــال قد مضلّي

أنا لا جيت اباأنســــــــــــاه لثوابي
خــــياله وانهمر دمـــــــعي يهلّي

وشوفه واقفاً من دون دمعي
حبيب القلب فيه يحلي

دعــــــــــــاني يا غــريب الدار عوّد
ترى مــالك محل الا مــــــــــحلّي

مكانك في عـــــيوني يا عـــــيوني
وصــــــــــدري من عناقك ما يملّي

احذر عدوك

كـلٍ يعـوَد لاصـل جـده ومـربـاه
راعي الشرف يشرف .. والانذال يهبون

الفرع مـن عـوده شرابـه ومسقـاه
والحنظلة مرة ولـو تشـرب مـزون

الطيـب كايـد .. والمناعيـر تقـواه
والهون هيُن .. تندع النفـس وتهـون

ناسٍ على كسـب المراجـل مضـرَاه
وناسٍ على كسب الفشيلـة يضـرَون

هذا على وضـح النقـا كـل ممشـاه
وهذا إذا شافـوه ربعـه .. يصـدون

لا تامن الخـوَان لـو زخـرف حكـاه
من خان بك مره .. يبي باكـر يخـون

وافطن .. ترى زول الرجاجيـل تـوَاه
كم واحدٍ يعجبك زولـه .. وهـو دون

يا طيَب الشـارات مـن يـوم منشـاه
احذر عدوَك .. لا يغدْرك علـى هـون

ترى عـدوَك غايتـه فيـك .. ومنـاه
يزرع بصدرك من قنا رمحه .. طعون

واللـي رضـع لبـوة عـدوك توقـاه
الجرو ولد اللبوة اللـي تعرفـون .. !

للطير يـا الصقـار بالريـش مغـواه
الجاهل اللي باكثـر الريـش مفتـون

للحـرْ والشبـوط مـاكـر ومجـنـاه
والفرق بالافعـال لـو هـم يطيـرون

حنا العرب
ماينسينا الخطا حب الخشوم
ولا يطهرك المطر عشرين عام
مخطين ترضى لنا ظلم الظلوم
ومخطين ترضى على شعبك يضام
بايعن شاري على شعبك تسوم
مايهمك بالحلال وبالحرام
لأجل شعبك بيننا كنت محشوم
لكن الحشمه خساره باللئام
يوم فشلنا صواريخ الخصوم
رحت ياوجه الفلس ترمي كلام
من شمال ومن جنوب أمسيتم قوم
وأنت تنخى كل مجرم بالظلام
وأتفقتوا خذلكم الله يالرخوم
تطعنون الجار وظهور الكرام
لاحيا فيكم ولانفسن تشوم
غركم فينا محبتنا السلام
كل غدارن تجهز للهجوم
من طمعكم ماحسبتم للملام
المعارك ماخذت ليله ويوم
سلموا جند الخطا ماب الحزام
وعود الغازي من الغزو مهزوم
وأمست دياره من أفعاله هدام
وطاحت قصور التماني والحلوم
وأكتفيتوا في طلب ظل الخيام
نحمد الله شيخنا راعي عزوم
والعظايم مالها غير العظام
قاموا اللي يطلب العليا يقوم
ماينام اليا بغى غيره ينام
أنتهض مثل العقاب اللي يحوم
لين جات صقوركم مثل الحمام
شيخنا قرمن تحدر من قروم
الملك ابن الملك ابن الأمام

ستل جناحه
ستل جناحه ثم حام ..يرقى على متن الهوا
يزفه بعيد وانا محدود في حد النظر

له بالهوا شف ومرام .. يلعب مع الغيمه سوا
ولا جناح لي واطير والأرض صارت لي مقر

طيري ضرب جو الهيام .. ولو دعيته ما التوى
عزي لمن طيره غدا ولا له من امره مقر

فكري تغشاه العسام .. أمسيت وفكري ما ضوى
الأرض قفر من الونس والليل من فرحي قفر

شبيت ضوي بالظلام .. في صحصح ذيبه عوى
ما لي أنيس إلا النجوم أو نور وضاح القمر

خالي وكني في زحام .. قلبي تلهب وانشوى
ما عاد أميز بالحشا ولا على الضو الجمر

وين انت يا داعي سلام .. وين انت يا بايع دوا
ردوا لي النومه ترى بالعين جلاد السهر

دورت بالشده حزام .. ولا لقيت اللي قوي
يا الله دخيلك ما لقيت اللي نشد به الظهر

من يقول الين مايكمل حلا:

من يقول الزين مايكمـل حـلاه
كل شي(ن) في حبيبـي اكتمـل
الله اللـي كملـه والله عـطـاه
مابقى للزين فـي خلّـي محـل
العيون أحلى من عيون المهـاه
شافها قلبي و صفّـق و احتفـل
نظرته من فتنتـه شعلـة حيـاه
والجفون من الحيا فيهـا كسـل
ساهم(ن) رمشه على الخد وسناه
كن لمعة وجنتـه ورد(ن) وطـل
الشفايا كنهـا جمـر الغضـاه
تحرس الريق المحلّى بالعسـل
والشعر ليل(ن) نقل حمرة مساه
أجعد(ن) حوّل على صدره همل
مايج من فوق متنـه ماطـواه
لون شلال(ن) مع المغرب نزل
وأنطلق جيده يماري في بهـاه
فوق مياس(ن) تعزّل واعتـدل
بالرشاقه فيه من ظبي الفـلاه
لي مشى كنّه على الروح انتقل
ريحته من كل زهـر(ن) منتقـاه
والزيـاده للخزامـى والنـفـل
صافي(ن) مثل المطر فوق الصفاه
باسـم مثـل البشايـر بالأمـل
جامع(ن) من كل زيـن منتهـاه
مستحيل الوصف في خلي سهـل
كايد(ن) ماهو يلين لمـن بغـاه
يرتفع عن كـل سقطـات الزلـل

كفاني عذاب

كفاني عذاب الله يجازيك بافعالك

جرحت الضمير ولا طرالك تداويني

مريض المحبه داه ودواه بوصالك

ألا كيف تبخل وانت نظرتك تشفيني

ألا عذابي كيف ما عاد يهنالك

سوى انك تشوف الموت بيديه يطويني

انا يوم احبك ماتذكرت غربالك

ولا قد خطر في بالي انك تجافيني

تفرغت لك يا ساكن القلب بحالك

تقل غيرك من الناس ماهم بحيين

أنا قام يطرا لي بلاحلام مرسالك

وطيفك حبيبي بي الاحلام ناسيني