كيف تعرف أهل الاحساء الطيبين

كيف تعرف أهل الأحساء الطيبين


1- اذا صلى الفرض وانتهى من صلاته .. وانتهى من التسبيح التفت على اللي في يمينه وسلم عليهم والتفت على اللي في شماله وسلم عليهم .

2- اذا شافك وقابلك في الطريق سلم عليك سواء كان يعرفك او ما يعرفك .

3- اذا جاورته ما لقيت من وراه اذيه , يعني ارقد وآمن .

4- تلاقيه بسيط , طبيعي , سموح , وسيع صدر , وعلى نياته.

5- اذا طق عليك الباب عطاك سله فيها رطب خلاص أو غر وإذا جاء وقت الصرام ما نساك من التمر الزين.

6- تلاقيه غارس في بيته فسيله وتشوفه مهتم فيها بنفسه.

7- تلاقي عنده سيارتين في الغالب تكون الاولى كابرس يروح عليها العمل , والثانيه سوبر حق طريق مكه .

8- تلاقيه طموح ابناءه اذا تخرجوا من الجامعه انهم اما يصيرون مدرسين او مهندسين في شركة ارامكوا .

9- اجتماعي من الطراز الاول , يعني ما تمل من سوالفه.

10- يزعل لكن قلبه ابيض بسرعه ينسى وعلشان كذا ما تلاقيه حقود .. واذا كان حقود يعنى شاذ عن القاعده .

11- اذا شاف شي غريب اول مره يشوفه او يسمع فيه .. قال ما شاء الله.

12- اذا قلت له .. على كيفك .. رد عليك وقال.. ما يحصل.

13- اذا جاء شهر رمضان طق عليك الباب وعطاك صحن هريس من طبخ ام عياله وتلاقيها متنغصته حق زوجتك.

14- اذا طلع تقاعد .. تلاقي طموحه عماره.. ومزرعه في الاحساء فيها بركه سباحه .. وتنور حق المندي.

15- يخاف من العين .. علشان كذا تلاقيه يقول لك .. قول ما شاء الله.

16- اذا كان ساكن في اي مدينه اخرى , وجا ء يوم الاربعاء حرك ونزل إلي الاحساء, و فوق كذا يحب يقضي العيد بين اهله وجماعته.

17- ما ينساك في العزايم والمناسبات , يعرف الاصول وكريم .

18- اذا شميت ريحة المشموم " الريحان " في بيتك اعرف ان زوجته كانت تزور زوجتك .

19- يستانس وينبسط إذا شاف له ناس من اهل الاحساء.

20- يحب يقراء اللى ينكتب عن الاحساء . . وعلشان كذا قراء كل الكلام اللى انا كتبته من 1 الى 20 ..


اتمنى لكم المتعه والاثاره والتشويق

يسلموووووووووووو اخوي / ابن الشرقية على المشاركة

والنعم بالناس الطيبين

مشكوووووووووووور

تسلم أخوي الغالي

وبقي ثنتين أنا أشوفها في أكثر أهل الحسا اللي أعرفهم (وأنا أعرف الكثير منهم) وهي :

أنه على وجهه ، يعني ما يعرف التحايل أو المكر ، إللي في قلبه على لسانه

وفي يحرجك بوفائه ، وهذي رأيتها من زملاء الدراسة ، فقد تفرقنا من ثمان سنوات ، ولا يزال أهل الأحسا متواصلين بكل أريحية ووفاء لم أر مثلها من كثير من الناس

ابن الشرقية
مشكور اخوي موضوع رائع واكثر من رائع

7- تلاقي عنده سيارتين في الغالب تكون الاولى كابرس يروح عليها العمل , والثانيه سوبر حق طريق مكه .

هههههههههههههههههههههههههههههههههههههههه

صدقت يابن الشرقيه

والله ونعم منك ومنهم

الله يعطيكم العافية جميعاً على الدرر التي قلتموها في تلك الكلمات وهذا ليس بالغريب فهي من مبادئ الأخلاق وقيمه ( أسناد الخير إلي أهله ).