ياعزوتي يابدر مااقرب حضايبـك
على الخطا والصبح حبك نقـازي

نوب تنسينا الشقا فـي عجايبـك
ونوب تولعهـا بليفـة وقـازي

ادناة مايرضيك وأدناة مااغضبـك
تلقط الغلطات لقـط الجهـازي

ماهي عداوة يوم اطالبك واضربك
أنته حفيد جدودنا ماانـت نـازي

لاشك انا يابدر ابنصحـك وادبـك
واعطيك عن كل المعاني أجـازي

تلقى فوايدها ليـا خـط شاربـك
بها على كل الوصايـا أمتيـازي

خلك شمالي عند زلـة قرايبـك
وعند الحقوق اليا نصنك حجازي

لاتذخر المذخور من دون واجبـك
اوف الحقوق اللازمات بنجـازي

للضيف والجيران ليّـن جوانبـك
وبالطيب جاز وبالردى لاتجـازي

احلم على زلة رفيقـك وصاحبـك
ادمح خطاهم لاتصيـر انتهـازي

يابـدر والله ماتخونـك مناسبـك
لك منسب طيب وساس عـزازي

وإن كان أبوي بكل الأحوال جاذبك
غلاك زاد وزاد فيك اعتـزازي