( التا ) تليت الباركر وسفهليت + وخففت من شيً ورا العوج كنيت
اكتب ونوب(ن) ياصفا الجو غنيت + وصف بين اللي يسطره واختار
( الثا ) ثمان السنين والسر مكتوم + المستفز الحاس ماياخذ اعلوم
واخطرت من قبل امس ثم امس واليوم + خطير ابيح ياعرب كل الاسرار
( الجا ) جمرة نار حب(ن) قديمه + عيا مع الايام يطفي جحيمه
والروح من ماجاه ماهي سليمه + وشلون يسلم من كوت روحه النار
( الحا ) حاولت اطفي جروحي بروحي + واقول مع سمر اليالي تروحي
لاشك عيت لاتشافى جروحي + وش صار والله مادري ويش اللي صار
( الخا ) خفوقي ضيقته الهواجيس + وش عاد لو اني تعوذ من إبليس
دايم معي ينبش جروح(ن) مراميس + من يوم أنا وللي تمنيته اصغار
( الدا ) دامك غايب(ن) ياحياتي + اسرح مع التفكير في ذكرياتي
واعيش بوهام الظفر للمماتي+ تذكار وسمك دايم الدوم تذكار
( الذا ) ذلي بعد زولك عن العين + ولاانت في قلبي وعقلي من السنين
البعد ناراً في صدور المحبين + واخف نار البعد كياً بمسمار
( الرا ) رماني حضي الشين يازين + على ظفاف النهر لا بين نارين
نار الرجا والياس ياداعج العين + خلت فوادي دايم الدوم محتار
( الزا ) زمان(ن)فات ماوالله انساه + اعيش لــجله وتلــذلــذ لــذكراه
لو رحت تبقى لي رسومه وطريــاه + لودجت بالاسفار في بعض الاقطار
( السين ) سم الروح ياسين حبك + فرح(ن) تقول أنا بعد من لــعبك
ياكن ودك بي تقرب للربك + ماتدري انك تاخذ الذنوبً اكثار
( الشين ) شخص علتي ياطبيبي + أنا الذي من سهم عينك صويبي
ادواي عندك حيل ماهو صعيبي + من شخص مثلك مايفكن الاعذار
( الصا ) صدري ضاق يامدمج الساق + الروح لـك تشتاق والقلب يشتاق
وان ماحصل شوفك علي الفضا ضاق + كني سجي(ن) دونه ابواب واسوار
( الضا ) ضدي وانت تعلم بضدي + وتدري بلي بيني وبينه تحدي
أجيك لو اني تجاوزت حدي + لــجلـك تعرضت المخاطر والأخطار
( الطا ) طويت البعد يازين الاوصاف + وحبيت مسرا الليل من حيث لاشاف
ياسين ماعندك لمن زاارك اسعاف + يبرد عنا نفسي عقب هم الاسفار
( الظا ) ظهرت بليلة(ن) مابها نور + على مكان(ن) بيننا كان مخبور
جيته يمار السور معاد به سور + الله واكبر ياتصاريف الاقدار
( العا ) عيت عيني النوم ترضاه + من عقب ماطالعت لسور وش جاه
عزاه ياجور الليالي ياعزاه + صدق الزمن غدار ياقيل غدار
( الغا )غيمة حزن فرقاك ياشوق + جتني يسوقه هاجسي للحشا سوق
ماشوف مافوقه ومن تحته ابروق + وفيها مطر ماهو مثل كل الامطار
( الفا ) فدتك الروح ياعذب الاجناس + يغلى من الغالين ياجوهر الاماس
ياحب من حبيت مايعرف الياس + ارجع وعادي لو تعنيت مشواار
( القا ) قاض الحب بيني وبينك + هديت(ن) قـــد بلــلــه دمع عينك
وأنا خذيته يالغضي من يدينك + وحفظتها باسر عن كــل الاضراار
( الكا ) كفتني جيتي للمكاني + جلست وأنا حس زولك وزاني
وسرحت باتفكير والطيف جاني + كنه بعد يحمل من احبابي اخبار
( اللام ) لــد الـياس يازين لــده + احيا الامل تحيا معاه الموده
النفس نــده بس شوفتك نــده + ماله مطاميعً على قولك أكبار
(الميم ) مدري بس قلبي دليلي + اني بعد لو انتظر ماتجيلي
وقررت اعود من مكاني بليلي + واسري بظلما الليل ومطف الانواار
( النون ) نور العين والله حبيبي + ارجيه وترجاه حتى المشيبي
ياعل ربي يجعله من نصيبي + قبل يشيل الروح قصاف الاعماار
( الها ) هوا بالي وشفي وكيفي + شوفتك ياعذب السجايا الشريفي
زين وعقل رزين ماهو خفيفي + لؤلؤ وأنا لمعذب الروح بحاار
( الوا ) وشبك وش تبينا نسووي + انهبك والا يالريش العين تووي
عجل عسى تبرد بالاخبار ضوي + والا بداال الدار ياصاحبي دار
( اليا ) يمين الله مني ومنه + يبقى ولو حتى الظروف اقهرنه
وأنا معه باقي ولاخاب ظنه + عهداً تكرر بيننا أمراار وأمراار
وسلامتكم
اخوكم \ محمد الذرفي الشمري
توجدت مير الوجد ماينفع المحتاج \ ولايرجع اللي راح لو قلت ياوجدااااه