قالوا قصيدك زين لكنـك إبخيـل
ما قد كتبت بوصف خلك قصيـده
قلت اسمعوني زين يا أهل التحاليل
وإخذوا العلوم الموجزات الأكيـده
الوصف : من أروع فنون التماثيل
وما كل شاعر فالحقيقـة يجيـده
وأنا لو أكتب يعلم الله بهـا لليـل
مانـي مخلـي للقصايـد شريـده
والله لأجيب من المعاني تهاويـل
وأكشف خفايا المفـردات العنيـده
لاشك..ماني زي بعض المهابيـل
عمر الغني....ما باح يوم برصيده
ما صدتها....يا كود عقب البهاذيل
ولو علم القناص ما حاش صيـده
ماني بعاجز عـن أدق التفاصيـل
لكن وربـي...ذي عليكـم بعيـده
حبيبتي أبعد عليكـم مـن سهيـل
وعندي أهم من القصيـد وجديـده
نزهتا عن قول في وصفهـا قيـل
مافيـه داعـي والفريـدة فريـده
يكفي أقول : الكدش ماتلحق الخيل
هالشطر يكفي عن كتابة قصيـدة