هذي قصة قصيدة الشاعر عايد بن سعدي الذرفي الشمري

وهي انه كان عاشقلّه وحدةٍ من جماعته وكان هو بالرياض ورجع لديرته لقاها متزوجه رجع للرياض وهو متضايق وكان بوقتها توه صادر قرار اعدام المهربين وهو وصف نفسه بالمهرب وان زواج اللي يعشقها بمثابة حكم القصاص عليه .. اخليكم مع القصيده وان شاء الله تحوز على رضائكم ..!

القلـب كنـه بالسكاكيـن يشـعـط "
والروح مفجوجه كما فج الاصبـاح

ياتل قلبي تلـة الجمـس مـع خـط"
وياصيح قلبي صيحة السير لاصـاح

مع رملـةٍ قدمـه تغاريـز واهبـط"
شرار شكمانه تقـل ضـوح قـداح

عليـه حملـن بالشناكيـر يـربـط "
ومهربن حملـه غلاويـن واسـلاح

خايف على عمره وحملـه ومشتـط"
ان مسك راح الجمس واللي معه راح

ناظر وشاف الجمس مع ايسره نـط"
خفر السواحل عندهم سلطـة كفـاح

قالوا توقـف ميـر ماطـاع عبـط"
زاح الونيت وروح الجمس وانـزاح

بثنين والثالث على الجمـس يشحـط "
وان عط طبلونه عطا الجمس وارتاح

خفر السواحـل كلمـوا قدمـه نقـط"
مراكزن صكة علـى كـل الاجنـاح

الدرب قدمه يـوم حيصـر تـورط"
ماعاد يمديها مـع الـدرب مصفـاح

صكوبها مع كـل صـوب وتلخبـط"
واطلق عليه النار مع كـل الاشبـاح

مع بابه الايسر ضرب عرض واغبط"
صوب وطاح وطاح عنه متى طـاح

كلبش وحط القيد فـي رجلهـا حـط"
ودوه للتحقيـق واسلـوب الايضـاح

عقب العصا والسجن والفرش والبـط"
دانـوه بالترويـج وافسـاد الارواح

وحكم عليه اعدام بالسيـف الاسلـط"
وصدر قرار الحكم في بيض الالواح

تقسيـم ميـم ودال بالامـر يضبـط"
فـي ساحـة المذبـح تـولاه ذبـاح

قدمه شـرط وواقفـن قفـوه شـرط"
وجده نواح ومثلهـا وجـدي نـواح

عليك ياوجدي يابـو عنقـن انـوط"
اول صبرت وكمل الصبـر وانبـاح

لو ان مخلوق علـى الصبـر يغبـط"
لكان صبري جاب لي كل الاربـاح

نصيت من قرنه على المتـن يمشـط"
نكسـت لاشفتـه ولا ضالمـي لاح

ارضه بياح ويكشف الجمس لاغـط"
والارض تفضح واكثر الناس فضاح

ولاعندهم منهـو بوضعـي توسـط"
ومضرين نفسه على كسب الامـداح

ضاقت بي الكورة كما خرق مخيـط"
واضوق من السبحه على سلك مسباح

ماذوق حلو النـوم والجفـن ماغـط"
سهـران والله ماتهنيـت بـامـراح

عدي عضيض السم من ناب الارقط"
لاكض بانيابن تقل مضرب رمـاح

اول سبحت مع الهوى شط مع شـط"
واليوم غرقني عقـب مـان بسبـاح

أمل ان تعجبكم اخوكم الشمري الفضلي