=================

ولد العم الدويسي تفضل



يالله بنو للرعـــــــــــــــــد به زلازيل
ينشي من القبله صــــــــــــــدوق خياله
ينشي الضحى وهواســــــود كنه الليل
البرق به مثل الضـــــــويّ اشـتعاله
من واحد ما هوب منـّـــــــان وبخيل
رب كريم وكل حيّ يســـــــــــــــاله
سيل يعم ســـــــدير من غير تفصيل
عقب اربعين الحــــــــول يذكر كماله
الغاط والزلفي يحـــــــــــدّه مشاميل
وابا ذريه والوطـــــــــــي من سهاله
وياطى الرويضه والحــــريق مقابيل
وابا الســــــروج وما انحدر من قباله
ووراط يحيا به حـــــــــــلال مهـازيل
حيث هو اللي ينطــح الســـــــــيل جاله
والى انحدر يضفي على العــــوده السيل
وتمير ومجـــزّل تمـــــــــــلاّ اهجاله
يمطر على حرمه حقــــــوق مخاييل
يشبع به الحــــــرفي وراعي العماله
لعل وادي المجمعــــــــــه للمطافيل
وابا المياه علاوته والســفـــــــــــاله
يمطر على هدب الغروس المظـاليل
يحير سيله في النخــل والحيــــــاله
ووادي الفقي زين البسـاتين ونخيل
في القيض يسقي صـافي من زلاله
كدادهم كنه على ســــــاحل النيــل
تسمن معــــــــاويده ويكثــــــر رياله
يرجع سدير ويكثرن المحــــــــاصيل
تلقى به التاجر ينمي حـــــــــــــلاله
وان جا الضعيف بارد الكف ومعيــــل
يمشي على الرجلين مـــــاله ازماله
قليل شـــوف يشتكي من ردا الحيل
ما له حــــلال ويسـتحي من ظــلاله
جار لسمحين الوجيـــــــه المنــاويل
اهل سدير اهل السخا والجــــــزاله
ربع يسلونه بزين التعـــــــــــــــاليل
وكل يوسّــــــــــع خاطـــأره بالنزاله
يروح وركابه تهـــادى من الشـــــيل
من شـــاف حاله قال يا كثر مــــاله
رجّــــــالهم لو ماله إلا المعــــاميل
لابد مع ضيفه يســــــوي جمـــاله
يستاهلون المـدح جيل بعـد جيل
واللي يماريهــــم فهو من اهباله
يا كثر ما مدحوا وياما بهم قيــــل
للضيف راعي سدير خله إلحـاله
هشـّين بشـّين عـــدال عن الميل
سمحين وبضده لراعي الجهــاله
اقول شوف العين ما هو دهاويل
ما جيب لي نقل بخط الرســـــاله
وباقي العرب تلقى رجال مشاكيل
لابد للبــــــــــــــارود يبقـــى حثاله
وصلاة ربي عد رمــــــــل الغراميل
على النبي ســـــيد الكلام وكماله



الشاعر ابراهيم بن جعيثن