بسم الله الرحمن الرحيم
(( وصف الطيور الطايرة ))

سـلام يـا سامـع قصيـدي بتلحيـن = مـن خافـقٍ غربـال وقتـه يتـلّـه
ترحيبةٍ جزله علـى الراس والعيـن = ترحيبـةٍ تبـري عـن القلـب علّـه
ترحيب نشمـي بالرجـال الأصيليـن = ترحيب وافـي مـع ثبـوت الأدلّـه
بإعداد مـا تاقـف جمـوع المصليّـن = وإعـداد مـا عـدّو حـروف المجلّـه
يا سامعـي كـان المعانـي عناويـن = عنـوان قافـي مـا أتوقّـع تمـلّـه
في وصف أبو حمدان وصف العريبين = حرٍّ معـرّب مـا بهـا شـك لـلّـه
وصف الطيور الطايـره والشياهيـن = وصف البيـوت الشامخـات المطلّـه
وصف الخزامى والنفـل والرياحيـن = وصف الحطب والنار من حول دلّـه
وصف الشجاعه في عمـوم المياديـن = وصف البيوت اللّـي تضـمْ الأخلّـه
يا سامعي ماهـي بطـرق الدواويـن = ولانـي غليـل وشاكـيٍ نـار غلّـه
كلمة شرف من راس نـاسٍ شريفيـن = دام الخواطـر روّحــت مسفهـلّـه
عيّـت علـي جنونهـا والشياطـيـن = إستبسلـت سيـف المعانـي تسـلّـه
لعيـون ابـن عـرّوج جينـا ملبيّـن = دعوة عريبٍ درب طيبـه يدلّـــه
عمـر لـك الله لـو تبيهـا ملايـيـن = مـا تاجـد بجـزلات معنـاي زلّـه
يا ابن البخيت أمثـال طيبـك قليليـن = كريـم طيبـه بالزمـن واضـحٍ لّـه
ننسـاك لوتنسـى عربنـا فلسطـيـن = ولـو الشجـر يبخـل علينـا بظلّـه
ولو تسكن أهل الهنـد وسْـط الفلبيـن = ولو تصبـح أمريكـا غـداً مُستحلّـه
ولو قامت الصومال لمواجه الصيـن = قدرك بصدري مـا تزعـزع محلّـه
يا فزعة اللّي يشتكـي قسـوة الديَّـن = يا عز عين اللّـي تجـي فـازعٍ لّـه
أنـا اشهـد إنـك رامـيٍ للنياشيـن = رمية شجـاعٍ والهـدف بـاريٍ لّـه
يا طيـر شلـوى فزعتـك للمساكيـن = فزعـة خليـل وينتخـي فيـه خلّـه
دار الزمان وجار وقتـي مـن سنيـن = لـه عـادةٍ يـودع كثيـريـن قـلّـه
وحنّا نعيش بطاعـة الله علـى الديـن = درب التواصـل والتـرابـط نـدلّـه
وتفرقـوا فــي آل لام الكثيـريـن = وجيت وجمعت الشمـل ملّـه لملّـه
ياشيخ شمل طيـور شلـوى سلاميـن = شرواك وقته لو طغـى ناهـضٍ لّـه
أنت الشجـاع اللّـي يـذّب النياشيـن = أنـت الـذي مجـد النشامـا وصلّـه
أبـوك كـان ينـادي العانـي أهليـن = علمـاً بأنّـه يعمـل الـيـوم كـلّـه
ذبايحـه يشهـد بهـا نـاس حيـيّـن = مرحـوم لكـن ذكرهـا باقـيٍ لّــه
ولد علـي ملقـى جيـوش البعيديـن = مـودع علـومٍ كلهـا ضيـق فـلّـه
ألف ومية فـارس نشامـا وضاريـن = لفـوه جوعـا جوعهـم بايـنٍ لّــه
لاقاهـم بمليـون أهــلاً وسهلـيـن = ورواق بيته من عشـى السمـن بلّـه
به عرق طيب وعارفٍ عرقـه منيـن = من طيب حرٍ والزمـن صافـيٍ لّـه
من طيب أبو طربوش نسل المسميّـن = سيفـه علـى جـور الليالـي يسلّـه
ذكره قرابة ذكـر عصـر الفراعيـن = له ذكـر تاريـخٍ حشـى مـا تملّـه
ذكر البخيت محمـد وهاجـسٍ زيـن = فزعـة أصيـل وفـازع لناخـيٍ لّـه
يوم إنتختبه بنـت أبوهـا عـن البيـن = جاها وتاريخـه شـرح ماضـيٍ لّـه
يا سامعي بدري على الطيـب باقيـن = تاريـخ ابـن عـروّج وافـي سجلّـه
باقـي لمـارق فزعـتـه للغريبـيـن = اللي ذبح سبعـه لأجـل داخـلٍ لّـه
به سفك دم وقـص روس المعاديـن = يمكن لـو إن الخـوف رجـلٍ يشلّـه
وإنظر دلع سعفـه وتلقـى البراهيـن = بَكـره ولكـن ذكرهـا ذاكـرٍ لّــه
لـزّام مـات وذكـر لـزّام للحـيـن = في ذكر مثلـه مـا تشـوف المذلّـه
سيفه نجيبه لو غدو به ورى الصيـن = لا قـال نحفظلـه عمـر حافـظٍ لّـه
به ميـة فـارس روّحـو بالقديميـن = لا .. ميّه وفـارس وأنـا فاطـنٍ لّـه
علمٍ لآخـر غـزوةٍ لـه مـن سنيـن = وحنّـا ذكرنـا بالوفـا غـزوةٍ لّــه
جابه عمر حمـدان نسـل العزيزيـن = عسـى يظلّـه ربّنـا يــوم ظـلّـه
عفيف واضح مـن جـذور العفيفيـن = شهم وكريم ومـن وفـا وافـيٍ لّـه
له موقفٍ ما صـار بيـن السلاطيـن = حـقٍ ولا هـو طـاريٍ طـاريٍ لّـه
يومه صغير ولا دخل سـن عشريـن = نـاداه ملهـوفٍ وجـا عانـيٍ لّــه
ورهن شهادة مدرسـه لأجـل ميتيـن = لعيـون منهـو ينتخـي شاكـيٍ لّـه
يا سامعي واللي خلقنـا مـن الطيـن = إن المهابـه تاجهـا زاهــيٍ لّــه
ما قالها اللي ما حضر حرب تشريـن = علـمٍ وكـاد وقايلـه شـايـفٍ لّــه
واللـي جعلنـا نتـجـه للشريفـيـن = كن الكرم سهـم وعمـر رامـيٍ لّـه
في عامنا الخامس بعد عـام الألفيـن = دكتورنـا درب الفـخـر متصـلّـه
مديـر عـام وفاتـحٍ بـاب تأمـيـن = يربـط أوروبـا بآسـيـا المستقـلّـه
يرعى ذوي العوز ويزور المصابيـن = مـدْ بعطـاه لمـن لفـى طالـبٍ لّـه
له عـزوةٍ تكسـر عظـام المعاديـن = بعيـال عمّـه بالزمـن عـزوةٍ لّــه
وله أربـع إخـوانٍ نشامـا نزيهيـن = يكفـون لامـن زوّد الوقـت غـلّـه
عامر علـى راس الرجـال الوفييّـن = لا جـار وقتـه وإحتمـى قـادرٍ لّـه
وزيـاد بإعـداد الرجـال النشيطيـن = الموقف الحامـي يجـي حامـيٍ لّـه
وأحمد دليـل لشـوف نـاسٍ نظيفيـن = درب الدنس ما هو حشى واطـيٍ لّـه
وعبدالكريم وشـوف نـاسٍ كريميـن = درب المبـادئ والكـرم عـارفٍ لّـه
وعنده ولـد ذيـبٍ وبحسـاب ذيبيـن = حمدان والمولـى عسـى حافـظٍ لّـه
وله ولد أخو حرٍ وبحسـاب حرّيـن = سطـام عامـر طلتـه خـوش طلـه
عيلـة كـرم وكبـار قـوم وكبيريـن = والواقـع أصـلاٍ مـا يبيلـه أدلّــه
يا عيـال لام البعـد طـوّل وبعديـن = الى متـى وضـع الجفـا مـا نحلّـه
القصر مـا يبنـا بـلا نـاس بانيـن = وحنّـا بنينـا ومجدنـا ساكـنٍ لّــه
لابـد نذكـر كاننـا اليـوم ناسـيـن = قبـل الولـد فينـا زمـانـه يعـلّـه
تاريخنا ما هـو علـى عـام عاميـن = تاريـخ وافـي بالـزمـن نستـدلّـه
حنّـا بنـا ملقـى جمـوع المعاديـن = رجّالنـا وقتـه غـدا ضامـيٍ لّــه
وما دامنا جينا علـى الطيـب ناويـن = اللي سـأل يـا حـرف معنـاي قلّـه
إن الوفـا ممشـى وجينـاه ماشـيـن = واللي وفـا ذكـر الوفـا دايـمٍ لّـه
نبـي نعـدّل مـايـلات المـوازيـن = وننسـى أمـورٍ بالدهـر مستغـلّـه
يا سامعـي لازم نشـوف السديديـن = رايٍ موّحـد كلـنـا مـاشـيٍ لّــه
ربـعٍ نشامـا بالمواقـف شديـديـن = يرعـاهـم الـلـي كلـنـا نتكـلّـه
حرام مـا تبكـي عيـون السعيديـن = هـرجٍ وكـاد وشاهـده سامـعٍ لّـه
يا عمر لـو يملـى زمانـك عنيديـن = أنـت الـذي وزن الكـرم وازنٍ لّـه
أنت البعيـد اللـي مشـى للقريبيـن = أنت الـذي شمـل الوفـا عايـدٍ لّـه
ياقاضـيٍ حاجـات نـاسٍ ضعيفيـن = يامـن تمـايـل وقتـنـا وإعتـدلّـه
أنا أشهد إن اللي حكو فيـك مخطيـن = والوقت ضيّع من مشـى غـاديٍ لّـه
مثل الجنـون بـراس نـاسٍ مجانيـن = أهل العقـول اللـي غـدت مستزلّـه
واللي رفع سبع ورمى القـاع غاديـن = مثل الغرير اللي نسـى ماضـيٍ لّـه
وأنا وكـل رجـال ربعـك شهيديـن = إنـك ترابـط شملنـا بــاديٍ لّــه
وحنا معك دايم على العسـر والليـن = ومثلك طريـق المرجلـه مايـلٍ لّـه
يكفيك وقفاتـك مـع الزيـن والشيـن = حملـك ثقيـل وشايفـك شايـلٍ لّـه
عنـدك نصـوّت للغرابيـل تبطـيـن = عن قرب شيخٍ والفخـر مبطـيٍ لّـه
ولو للفخـر ورث وبغولـه وريثيـن = كان أنت بين الناس صرت ولـدٍ لّـه
ولو يحسبون الطيب عنـدك ملاييـن = ما يقضي ويقضي معـه حاسـبٍ لّـه
ولو فجرّوا ربـع السوالـف براكيـن = ما زعزعو مجـدٍ عمـر بانـيٍ لّـه
يا دنتـي سـوّي مثـل مـا تسوّيـن = إتكـي وهمّـك شيخنـا تاكـيٍ لّــه
إستقعـدي وإلا عسـى لا تقومـيـن = يكفي عمر جورك غـدى واقـفٍ لّـه
يالربع دام إنّـا علـى العـز رابيـن = والهـرج للـّي يستمـع كافـيٍ لّـه
فينا الفضول وحـي ذكـر الفضيليـن = رجّالهـم ميـل الزمـن سانـدٍ لّــه
وفينا المغيره عـز ماهـم صغيريـن = الذيـب فيهـم يبتهـج زاهــمٍ لّــه
وفينـا مـن الكثـران نـاسٍ أكيديـن = الحـر منهـم وقتنـا شـايـمٍ لّــه
فـي آل لام العـز ملقـى لعانـيـن = بيـت المكـارم والوفـا بانـيٍ لّــه
ربعٍ بـرو غبـن الرجـال المغابيـن = فيهم ذرى المغبـون مـن غابـنٍ لّـه
يا عمر صار القاف تسعـه وتسعيـن = سمعـت قـافٍ شاعـرك كاتـبٍ لّـه
أبي أكتفـي بميّـه ولا أقـول ميتيـن = أخـاف مـن يسمـع حديثـي يملّـه