ظلم الغريب اهون ولاظلم الاقراب

الشاعر فهد بن صنهات الديحاني


ظلم الغريب أهــــــــــون ولا ظلم الاقراب
حيث الظليمه من قريبــــــــــــــــك مصيبه
وعيب القريب اصعب من عيوب الاغراب
حيث القريب يعيبــــــــــــــــــك اللي يعيبه
والله مايذبح طويليـــــــــــــــــــن الاشناب
غير القريب اللي طعــــــــــــــن في قريبه
عقب القرابه والغلا صــــــــــرتو احزاب
ولحد ٍ جنى من فعلتـــــــــــــــه كود خيبه
بالله لايكثر ترى خـــــــــــــــاطري طاب
مليت من كثر الجـــــــــــــــروح العطيبه
الفرق واضح بيــــــــــن صادق ونصّاب
والحق يطلع لو يطــــــــــــــــــوّل مغيبه
وان كان بالدنيا محــــــــد حاسب حساب
بالآخره رب ٍ خلقنــــــــــــــــــــا حسيبه
وانا قسم بالله لايمكــــــــــــــــــن ارتاب
ولا حبّ هرج ٍ فيــــــــــــــه نمـّه وغيبه
احب اقول الصـّـــــــــــــدق حتى لكذاب
واحب اجازي مـــــــــــن غمرني بطيبه
وإلا الرّدي له عنــــــــــــدنا حفنة تراب
وان غاب ماقلنــــــــــــا عسى الله يجيبه
بسّ انت ياليتــــــــــــــك تفكّر بالاسباب
حيث الظليمه مــــــــــــن قريبك مصيبه






إنشاءالله تعجبكم والعذر إذا سبق نشرها