الله يمسيكم بالخير جميع

أنا راح أجاوب على الأسئلة بناء على طلب أخوي راعي العليا

طبعا بعد إذن أخوي ابن عباد

باسم الله نبدأ

1- ماهي علاقتك بالشعر؟

علاقتي بالشعر علاقة قوية بدأت منذ الصغر فقد تأثرت بالشايب الله يطول في عمره

وأنا لاأمل من ترديد الشعر أو كتابته

2- من هو شاعرك المفضل؟

الشعراء المفضلين عندي كثير لكني أفضل

الشاعر محمد الأحمد السديري والشاعر ناصر القحطاني

3- أعضاء تثق في ذائقتهم الشعرية؟

الكثير من الأعضاء من متذوقي الشعر وفيهم شعراء كثير

وأعذروني ماأقدر أحدد

4- عضو تقول إنه سوبر ستار الشعر بنبض العاصمة؟

مافهمت وش المقصود ( نبض العاصمة )؟؟!!

5- قصيدة تعدها من أروع القصائد؟

القصائد الرائعة كثيرة لكن أبعطيكم هالقصيدة اللي ماعرفت شاعرها

واللي يعرفه ياليت يعلمنا به

نـامـت جـفـون اللي مـن الليل سارين *** مــل الـغـنــا مـنـهــا ومــلت غـنـاها

وشاب الندى وأغضت قلوب المنادين *** والفجـر ساق أتـلى النجـوم ونحاها

والـعـيـن قـفـاهـا مـن اللـيـل ثـلـثـيــن *** وأنـا عـلـى الـثـلـث الأخير وحراها

مـوعـدك يـامـنـزل تـبـارك ويـاســيــن *** فـي سـاعـة فـيـهـا نـزولك مـداهــا

سـبـحـانــك اللـهــم مـاسـبـلـت عــيــن *** وإلا فجوج الـغـرب ذعذع هـواهــا

سجـدت لك بيـن الضـعـوف المساكين *** وأبديت لك صبر الضلوع وعواهـا

فـزعـتـك يابا الجـود نـصر الضـعـيفين *** ومـنـتـك يـوم النـاس شـحت يداها

6- هل لك محاولات في كتابة الشعر؟

نعم لي محاولات شعرية في بداياتي وقد كانت تفتقد الوزن في بعض الأحيان

أما ذا الحين ولله الحمد أتقنت الوزن وأصبحت على دراية ببحور الشعر

7- لك مساحة بلا حدود وحرية بلا قيود أمتعنا بقصيدة على ذوقك؟

هذي قصيدة رائعة للشاعر فالح الناهي أبجيب بعض الأبيات منها

تمضي سنين العمر وتقل الأصحاب *** والآدمـي ربـحـه بـالأيـام خـافــي

أبـواب تـقـفـل والـولي يفتـح أبـواب *** أمـراض تـنـزل والكريم المعافي

أشيا تشـد أعـصاب وتريح أعصاب *** والعمر مايبقى على طول صـافي

الــوقــت مـد رقـاب ويـنـزل رقــاب *** ولـولا المرض مانهـتـني بالعوافي

راع الـفـقـر لايامـن يـجـر الأسلاب *** ومـن يـغـتـني لايـامن يصير حافي

ياصاحبي لاتحـسـب الظـرف غــلاب *** لو هو جفاني الوقت ماني بجافي

قـدرك بقـلـبي لـو فـتـحنـا لـه حساب *** يملا بـنـوك الـحـب ويـقـول كـافي

إنـت التـجـارة والخـسـارة بالأحـبـاب *** وصلـك على تقصير الايام صافي

لاصـار خـلـك ينحسب ضمن الأغراب *** أوغـاب بـالـدنـيـا صـديـق سنافي

والـقـل قـل العـرف أو قـل الاصـحــاب *** والرزق بإيد اللي يدير السوافي

8- بيت شعر إذا ضاق صدرك تردده؟

ياضايق أبشر بالفرج من ورا الضيق **** ضاقت وعند الله وسيعات الأبواب

9- اهدي بيت شعر لعضو في المنتدى.

هذا بيت شعر أهديه لجميع الأعضاء في المنتدى

محظوظ من رافق من الناس شرواك **** في ذمتي بيعيش والراس مرفوع

10- أجمل بيت غزل مر عليك؟

أبيات الغزل الجميلة كثير لكن إلا ذا الحين مامر علي أجمل من بيت الأمير خالد الفيصل

نصف زين الخلايق في عيونه **** وباقي الزين في تاليه كله

أتمنى أن أكون قد وفقت في الإجابة عن الأسئلة

تقبلوا تحياتي...بانتظار أخوي ابن عباد