للشاعر: الأمير عبدالله الفيصل
انا بليـت بحبكم مـن هبالي =والا انت ظل مالنا فيه مقيال
(خيرك لغيري والشقا والعنا لي =والمشكل اني عارف كل الاحوال)
أرمي بــروحي في بحرك الزلالي =وتنسفني أمواجك على يابس الجال
اسأل فراشي كيف امضي الليالي =بالليل لي حال ومعكم لي أحوال
مـن خوفي الشمات تـشمت بحالي =ويكثر على من العدا القيل والقال
أنت السبب ولعتني ياغـــزالي =وفتحت لي دنيا جديدة بالامال
وابعدت خــلاني وجـيتك لحالي =وفرشت قلبي لك مقر ومدهال
ويوم أبعدن حبالهم عن حبالي =ودريت انك عندنا غالي المال
أبديت عقب الحب صافي الجفا لي =وخليتني محتار في أشهب اللال
نصــيت رب عـــالم ماجرا لي =ماحط دون الخلق حاجب ومرسال
منحني السلوان مـنشي الخيالي =ورد الحياة لسايل ماطلب مال
وأبعد خيالك خالقي عن خيالي =وقصر علي الليل من عقب ماطال
واليوم ترسل لي وتبدي الوفالي =وتبدي لي أعذار قصيرات وطوال
تبي تجدد ما انقطع من وصـــالي =وتبدي من الفتنة لي ألوان وأشكال
تردني في حــالي اللي مــضى لي =ترضي غرورك بس ياحسن الاقبال
ماعــاد تخدعني عقب مابــدا لي =وان عدت فيما عفت مانيب رجال