لكن طلب مثلك على الراس والعيـن = مثلك نطيّـب لا طلـب خاطـرٍ لّـه
إحسب معاي وجـوّد حسابهـا زيـن = متّـع خيالـك دامنـي شاعـرٍ لّــه
واحد معه واحد كـذا صـارن إثنيـن = والواحد اللي مـا يجـي ثانـيٍ لّـه
لعيونـك أكتـب بالحماسـه كتابـيـن = وأشرح وحرفي هاجسـي جايـدٍٍ لّـه
والألف لو قلنـا معـاه ألـف ألفيـن = أكتبلك ألـف وأنحسـب كاتـبٍ لّـه
أزهـم وأنـادي للجنـون السليطيـن = وأزيـد طيـن القـاف لا قلـت بلّـه
كن الجنون أمسـت لعينـك مساجيـن = لو غـاب منهـا فردهـا ساجـنٍ لّـه
وصفك وفا لأهل القلـوب السليميـن = بك وصف حـرٍ ينبسـط ناظـرٍ لّـه
وصف الخيول اللي عليها النشيطيـن = كن الكرم خيل وعمـر عاسـفٍ لّـه
وصف الجموس اللي عليها الشكاميـن = وصف الرعـود وغيـث غيـمٍ يهلّـه
يالصيرمي خذنا بـدل سيـف سيفيـن = وإضرب بنا من فـوق روس المذلّـه
إصعد يجيك القاف والحـرف عانيـن = القاف يصعـد مـا تجـي نـازلٍ لّـه
يا معرّب الحيّـيـن وأنعـم بجدّيـن = دام الخـوال دروز وش باقـيٍ لّــه
يوم إنهم قامو غضـب عـام الألفيـن = إشكالـهـم بـشّـار روّح يـحـلّـه
ربعٍ بني معـروف بالطيـب ماشيـن = الطيب فيهم مـن مهـو عـارفٍ لّـه
الضيف لا جاهم لقـى قولـة أهليـن = وبعض العرب ضيف الليالـي تملّـه
خوالـك ونعـم وعمامـك ونعمـيـن = مرحـوم أبـوك وربّنـا راحـمٍ لّـه
يرسلك تمشـي بالمسافـات عشريـن = عشرين كيلـو تقتضـي حاجـةٍ لّـه
أنا أشهد إنك مـن رجـالٍ عزيزيـن = تفعـل وفعلـك والـدك جايـزٍ لّــه
من دور ابن لـزّام وأنتـم عظيميـن = رجّالكـم كيـد الدهـر كـايـدٍ لّــه
رجّالكـم يوقـف بموقـف ثمانـيـن = ما صاحب وخوّن وفـا صاحـبٍ لّـه
ربعك يا ابن عـروّج ربـعٍ عديميـن = خيّالهـم موتـه مهـو حاسـبٍ لّــه
يا سامعي طالت ولكـن علـى ويـن = إسمع معي علمـي وأنـا نـاويٍ لّـه
لاحظ وش اللي صار في حرب حطّين = شف علمنا واللـي خلـق والـيٍ لّـه
وشف برج إيفل وإنظر السور بالصين = وإلمح لقـدرة عبـد مـن عابـدٍ لّـه
والخمس كانن بالصـلاوات خمسيـن = خفّـن لشافـع قـدّره شـافـعٍ لّــه
والحـق واضـح مـا يبيلـه تلاويـن = طيب الوفا قصدي وأنـا قاصـدٍ لّـه
مضى الزمان وراحو رجال ماضيـن = وكـلٍ بقالـه بالزمـن ماضـيٍ لّـه
والرمش ربي خالقـه يحمـي العيـن = والعدل واضح في نحـر عـادلٍ لّـه
والشعِر فطره وأغلب الخلـق داريـن = وكلٍ رضى باللي الولـي قاسـمٍ لّـه
وأنا كتبـت ومطلبـي بـس هالحيـن = إن الـذي يسمـع معـي مـا يمـلّـه
قافٍ علـى نظـم وعهـود وقوانيـن = والـدرس ينفـع بالزمـن دارسٍ لّـه
والعلـم ثأثيـره عليـنـا مهو شـيـن = إن مـا نفـع مـا ينزعـج داريٍ لّـه
أجـل ترانـا بالهواجيـس سـاريـن = مثل الذهب لامـن نفـع صايـغٍ لّـه
مثـل الشجاعـه والكـرم والنياشيـن = نيشـان قافـي صوّبـه فـارسٍ لّـه
عمر رمـاه وحولـه رْجـال راميـن = والكـل منهـم والهـدف رامـيٍ لّـه
عمر عسى المولى يصونك عن العين = والحسد الأقشر في نحر حاسـدٍ لّـه
ردوّ معي يالربـع فـي قولـة آميـن = دام الدعـا بـه منفعـة داعـيٍ لّــه
عمر بخيـت ومـن تلاقـي بخيتيـن = وا سعْد من مثلـك لفـى لاقـيٍ لّـه
عندك سعـد لا قـام قهـو النزيليـن = قومـة كريـمٍ والكـرم حالـيٍ لّــه
ولا شفت أبو ياسـر وجينـاك لافيـن = بـه بـذر طيـب وينتفـع بـاذرٍ لّـه
ولك ولد عمٍ للمعـادي عمـى العيـن = خالـد أبـو سلطـان والطيـب خلّـه
وخالد وعبـدالله الحمـد والحميديـن = وأنور ومنور وجمعــنا جامـعٍ لّـه
ورايـد وأبو وائـل وربعـك أصيليـن = مثلـك أصيـلٍ والفخـر رايـدٍ لّـه
وأبي اذكر البيشي وذكرت القليلين القليليـن = وإلا أنت حولك مجد من ماجـدٍ لّـه
عامـر لحالـه مـا يكفيّـه تسعـيـن = تسعين قـاف وشاعـرك ساطـرٍ لّـه
ربعه بني وايل على العـز ضاريـن = ذكـرٍ لإبـن قيـران محـدٍ يمـلّـه
ومحمد آل السعيّد وابو مشاري الوفيّين = وطراد ثوب من الفخر لايـقٍ لّــه
وإن قلت أبو خالد أقول ألـف أهليـن = حيّاك يا طـاري طـرى طـاريٍ لّـه
الذيب أنـور وإدبل النعم نعـــمين = الحر ابـن وايـل وأنـا ذاكـرٍ لّـه
وفي خالد الياقـوت زينٍ على زيـن = القاف لعيونه يجي زايــــنٍ لّــه
به للأمانه شـــوف ناسٍ أمينــين = وأتابع المعــــنى وأنا رايقٍ لّــه
ناديـت نفسـي كملّـي لا تخافـيـن = حاضر عمر وش عاد أنا خايـفٍ لّـه
وأنخى جنوني واصلـي لا تخونيـن = إرقـي لمجـدٍ يهتنـي راقـيٍ لّــه
وإن ضعت ضيعي لا تقولين من ويـن = أوفي معي وأنـا الوفـا واصـلٍ لّـه
تـوّي شبـاب ولا وداخـلٍ بالثلاثيـن = وأعبد ربّي وألتجــي ساجـدٍ لّـه
رجواك يا خالق عبادك مـن الطيـن = يـا واحـدٍ فـوق الخلايـق محـلّـه
إنك تعيـن اللـي رحـم للرحوميـن = ولا ينرحم مـن لا تبـي رحمـةٍ لّـه
يا نفـس مـا أظنّـك معايـه تعانيـن = إمشـي بدربـي دامنـي نـاويٍ لّـه
يـا نفـس دامـك للطويلـه تروميـن = أوفي وفا نـواف مـع صاحـبٍ لّـه
ياللي سمعـت علـوم نـاسٍ قويميـن = علمٍ لفـاك إن جـاك قـم قايـمٍ لّـه
تـراي وصيّـت القصيـده وصاتيـن = والحرف يسمعني وأنـا راصـدٍ لّـه
قلت إثقلـي مـا بيـن نـاسٍ ثقيليـن = جودي لشيـخٍ خاطـري جايـدٍ لّـه
وتعبطّـي شـراً لـنـاسٍ عبيطـيـن = واللي يطيـش يشوفنـي طايـشٍ لّـه
طور السنين أقسم به الله مـع التيـن = ولا يقسم بخلقـه سـوى خالـقٍ لّـه
واللـي خلقنـا يالرجـال الحشيميـن = صغت المعانـي كلّهـا حشمـةٍ لّـه
عطـوف لصغـار ورحـوم لمسنيّـن = لابدْ يكتــب وقتنـا صفحـةٍ لّـه
يالشيـخ لعيونـك نشـامـا ميامـيـن = يا مسعف اللي يرتجـي مسعـفٍ لّـه
قدّامـك رجـالٍ تـروع البغيضـيـن = رغم إن مثلك ما يجـي مبغـضٍ لّـه
إرقى سنـود وبالعهـد خـذ يمينيـن = حي السنود اللـي تجـي راقـيٍ لّـه
تقول لأمـك أصبـري يـوم يوميـن = مشان حاجة مـن يبـي حاجـةٍ لّـه
ماكـن ربّـي خالـقٍ مثلـك إثنـيـن = بك شوف حاتـم والكـرم ماثـلٍ لّـه
أنت التواضـع لا تهـاب الوضيعيـن = أنـت التسامـي والعُـلا سامـيٍ لّـه
أنت التسامـح عنـد نـاسٍ سميحيـن = هنيْ مـن مثلـك غـدى سامـحٍ لّـه
أنـت المثـال ولا يجيلـك مثيلـيـن = أنت الـذي ثـوب الوفـا سـادلٍ لّـه
أنت الـذرى للـي يجونـك غريبيـن = كـن الكـرم ينبـع وبـك منبـعٍ لّـه
وأنت الوفـا بقلـوب نـاسٍ قريبيـن = والموت لو يقرب تجـي قـاربٍ لّـه
يا عمر ما قلتـه وأنـا قاصـدٍ شِيـن = علـمٍ وكـاد ويثبتـه هــارجٍ لّــه
ياربعـنـا والعـلـم ردوّه علمـيـن = عمر لعب بالطيـب فـي نـاديٍ لّـه
دليـل .. لا تقبـل وخذلـك دليليـن = ولا يشكي الضميان من مـرويٍ لّـه
وحنّـا لـك الله يالمعانـد عنيـديـن = والحمل شاله مـن لفـى بـاركٍ لّـه
والنـاس بالدنيـا بـلا شـك فانـيـن = من جاد ما جـوده غـدى فانـيٍ لّـه
أحيان أشوف إنسان عايـش بوجهيـن = لابدْ مـا يكشـف غطـا ساتـرٍ لّـه
وأحيان أشوف إنسان عادي مسيكيـن = خبث الليالي مـا يجـي فاطـنٍ لّـه
وبعض آدمي مثل البحر عند ضاميـن = يا كثـر مـاه ولا روى ضامـيٍ لّـه
وبعض آدمي بالطيب مثـل الفُراتيـن = عـذبٍ ويـروي ضامـيٍ لا وصلّـه
بس الأكيـد الرمـح يحتـاج راميـن = مشـان ياصلّـه هـدف رايـحٍ لّــه
ولا كل رامي جاد ضـرب النياشيـن = ولا كل رمحٍ فـي يـدا ضـاربٍ لّـه
وأشوف مـن يشقـى لهـم الشقييـن = وأشوف هـمٍ مـا لقـى شاقـيٍ لّـه
يالربع طـال القـاف وأنتـم شهيديـن = وأخـاف مليّتـو وأنـا قـايـلٍ لّــه
بـس المهـم وعنـد نـاسٍ مهمـيـن = شـوف النشامـا خافقـي هايـمٍ لّـه
مثل الهـوى بصـدور نـاسٍ محبيّـن = مثل العذاب لمـن شكـى دمعـةٍ لّـه
مثل السعاده فـي عيـون السعيديـن = مثل الهـواوي لا لقـى هـاويٍ لّـه
مثل الفـرح لا حـل عنـد التعيسيـن = شـيٍ يشوفـه بالنظـر جاهـلٍ لّـه
يا عيال لام وزبـدة الهـرج هالحيـن = من خاطر اللي شوفكـم ساعـيٍ لّـه
إنّـا جمعنـا بيـت عـزّ وعزيزيـن = وحضوركم يشرح كرم حاضـرٍ لّـه
وأنا أحمد الله ما حضرنـا السفيهيـن = وكـل الخواطـر بالوفـا مسفهـلّـه
وأبي أعتذر يـا عيـال لام العريبيـن = طويت قافـي والزمـن طـاويٍ لّـه
يا عمر تمّت حسب عهـد الشريفِيـن = وبالمسك بإسمك شاعـرك خاتـمٍ لّـه
توّه وصـل قافـي بالأبيـات ميتيـن = والقاف شامخ فـي ذرى شامـخٍ لّـه