النفس صعب تبيح بخافي أسراره = لا يغرك بزيف لو انه ضحك سني
أضحك وجامل وروحي حيل منهاره = لا جيت برقد دواكيك يدكني
لعنة زماني تطاردني تبي ثاره = وأنا معيي وأقول اني ولو اني
ألعنه تاره وهو يلعن هلي تاره = وابليس متمركي ( بالمخ ) ويزني
القلب لونك تناظر في وسط غاره = ما كان لمت ( الكثيري ) لو هو يجني
صفر على صفر ناتج جمع بأصفاره = يضرب يقسم بعد صفر يساوني
يخوك قلبي تحمل فوق مقداره = والله في دنيتي ماني بمتهني
دام ( الكثيري ) بدت تلعبه أفكاره = دن الدلال الصفر ياصاحبي مني
بلله تحرص عليها راقب فواره = اظبط مقاسات هيله واظبط البني
والهيل زود معه ياخوك مسماره = لامن رشفته صحى في داخلي جني
معها من ( المال بورو ) بصمخ زقاره = باشب جوف الحشى وابيح ماكني
لامن راسي تقند واعتلا عياره = والأرض ويا السما عين يحملني
في ساعته صاحبك تامر على أشعاره = تامر وهنه وحدهن جن يحندني
هلت شياطين شعري تقدح بناره = بنات فكري بوسط الجوف لجني
جني يشيلنها عباره وري عباره = نوبات حدو ونوبات يهجنني
أنا أعترف قصرت رجلي بمسياره = الوقت وظروفه الشينه يحدني
مثلي تعذر ومثلك يقبل أعذاره = ان كان ياصاحبي ظنك على ظني
كذبت منهو يقول أيام دواره = قظيت عمري رحى الأيام تطحني
رويت من كاس هم تارع أمراره = الوقت عين دواليبه يدورني
كل ما كسرته لحق في غارته غاره = صكات بقعا علامه ما يهدني
وأنا صغير غرير أشبر الحاره = يا ما كتوفي من الأحمال شالني
الجيش لولا المعيشه عفت ديناره = ماكان مع كل صبح جيت متعني
كرهت شوف المعسكر و أبغض أشجاره = وأكره مهاجع كتيبتنا وأهل هني
لا غبت يومن رموني وسط نظاره = ولد ( ...) ( ........) (........) يسجني
لكن مع كل هذا النفس صباره = أبي غناتي بذاتي كاره المني
تدري عشيرك وقع بالحب واغماره = هواوي ساهر للفجر ويغني
بلي معي ما بقالي غير تذكاره = ( ورع ) أصارع طيوفه ما درى عني
كل العذارى ( ؟؟؟؟؟) ما تلفت أنظاره = عقب الذي من غلاه الشوق جنني
وسط الحشى هايجه تطارد أمهاره = تجتال تصهل وترزم ما يهيدني
بفتح دفاتر قديمه وأنفض اغباره = وأقرى قصيد كتبته من صغر سني
اليوم مدري وربي عن هوى داره = في وسط نجد هفا ما عاد طمني
جنيت من كثر ما نشد عن أخباره = اللي لفاني ووصي من صدر مني
العقل ماعاد باقي غير معشاره = والروح بارت ظعونه يوم قفني
أصيح وا لوح له لوحات صقاره = والطير ولى مع طيور يحومني
أجي وراعي لبيته وأنظر اجداره = ودموع عيني على خدودي يهلني
من حب غاليه قمت أقبل أحجاره = أحضن بيبانه بشوق ويحضنني
ثمن أصفق يمين الكف بيساره = واكبر قهر دونه حدود يردني
ماحيلتي غير شعر بطرق ابحاره = بيت أمحيه وبعض أبيات يمحني
عزي لمن هو مثيلي طالت أسفاره = كل ما يجد المسير الطرق طالني