اتكلنا على الله و استدر يا النداوي=الحبارى تبين و انت فعلك تمام
اضرب اضرب فداك اللاش و الفكر ضاوي=في علوم ٍ كبار و بلبله و انقسام
يا ظهور الخيول ان حان وقت العزاوي=الله اكبر على من خان شرع الامام
جاك من شاعر المليون سيل ٍ نحاوي=جعل من حدره للنار لحم و عظام
شلة ٍ طبلت فـابو ظبي و الدعاوي=كل ابوها تسفر للنسا و انهزام
دوروا لي على من شجعت كل غاوي=خالفت شرع دولتنا و حكم النظام
اسمعي شاعر ٍ من نجد ما هوب ياوي=دون دينه و من فرّط عليه الملام
البرا من تميم ان ما طليت اللغاوي=لين ركنه يعوّد عقب بنيه هدام
اهرجي يا القصايد بلغي كل راوي=من تعرّض مشايخنا عليه السلام
ذيب يا اللي على ابانات و طويق عاوي=جرها جرها جت لك على ما يرام
يزمي المر فـكبدي و لاله مداوي=وش علاج الكبود و مرها زام زام
و يش عذري من الله في نهار البلاوي=في نهار ٍ تدنى الشمس وسط الزحام
و يش عذري من محمد ليا جيت ناوي=آرد الحوض ابشرب ثم قالوا حرام
و يش عذري و انا مسلم و عقلي رهاوي=لا رضيت المذله ما يفيد الكلام
أولاً شيخنا البراك نجم ٍ سماوي=ما يضره نباح الكلب شرق ٍ و شام
ثانياً عاشراً مليار انا له فداوي=عد ما لاح برق و عد ما امطر غمام