.

.

.

للطيب درب وللردا ألف مسهاج=وانا تباريت الوفا في طريقه
يابوي اخبرك للوفا نور واسراج=وخابرك مفتاح الدروب الغليقه
وان كان شفتن بالرديات دوّاج=لابد نور العقل يشعل بريقه
ولابد للمخلوق في يوم يحتاج=اما خشير الدم والا رفيقه
الضيق فيني مع سنا النور ينباج=والنوم ضيع يم عيني طريقه
والله ما جاها من النوم هملاج=وانا جروحي غايراتٍ عميقه
للهم في صدري محيطات وأمواج=يابوي زادت ضيقت الصدر ضيقه
العين تزعج ما سكن موقي ازعاج=حتى تركت دموع عيني عتيقه
اللي هويته للسهد داء وعلاج=اللي مابين ضلوع صدري مضيقه
ام التدلع والترف والتغناج=مدري عشير الزين والا رفيقه
وأم الشفايف تذبح بـ لولو وعاج=اللي اختلط صافي الشهد وسط ريقه
العين بيته والحرس رمش وحجاج=كل البني من عقبها في حريقه
فيني الهواجس من جفا عينه افواج=تقفي وتقبل في ثوان ودقيقه
ما عاد لي عن حبها اليوم مخراج=ولا عاد انا اقدر حمل مالا اطيقه
والله لو غيره على عيني افواج=ماصد عنها كان تبغا الحقيقه