البارحة يوم المخاليق هاجعه ،.،.، في نومها كل ٍ هجع مع مهاجعه

ما بات طرف العين منّي ولا غفا ،.،.، ولا هنا حلو المبات و مضاجعه

"غفا ما غفا .. واللي بعد ما غفا .. غفا" ،.،.، وانا ساهر ٍ ما ذاق طرفي مهاجعه

وأسبابها ورقا ً تغنّي على الغصن ،.،.، العصر تلعي فوق الأغصان ساجعه

الله لا يجزاك بالخير ورقا ،.،.، زدتي على قلبي عناه و مواجعه

لا حرّك الغصن الحمامه تمايلت ،.،.، مع الريح والنسناس و تعود راجعه

وتغني طرب وانا الذي زاد حزني ،.،.، مثل الذي فاجاه بالوقت فاجعه

يا ورق كف غناك لا تزيد لوعتي ،.،.، أظنك عن اللحن الحزين متراجعه

وإلا عساك لموحش ٍ مشتهي العشا ،.،.، ويمسي قليبك بالمخاليب جامعه

لأنك سبب للنوح و الحزن و الشقى ،.،.، والشوق و الفرقا و ذكرى مراجعه

ذكرى ( .... ) اللي براني فراقها ،.،.، ولاهي من اللي بالحوانيت ماجعه

عسى من يلوم اللي تذكر حبيبته ،.،.، تاطا ببطنه خيل شيخ الأشاجعه

ليت الهوى رجل ٍ وأشوفه إلى بدا ،.،.، وأجاريه وأنزل بالمنازل و أشاجعه

مير الهوى يبدأ صغير ٍ و يكبر ،.،.، ولا تدري إلا لين يحكم مجامعه

وتصبح بعدها تجاوب الصوت و الصدى ،.،.، صوت الحمامه فوق الأغصان ساجعه




::



بقلمي / عســـاف