يزعل ولامن بالزعـل زاد غيّـه = يسبْ كل اللّي هـوَنْ مـا عداهـا
قامـت تجيـه أفكـار جهنمـيّـه = مجنون نفسـه بالغـزل واهناهـا
محبوبتـه تمشـي شويّـه شويّـه = يمشي لك الله من عذابـه وراهـا
مـا كنّهـا إلا جـادلٍ مغربـيّـه = والمغربي من زود شوقه خذاهـا
أو كنّهـا اللّـي نجمـةٍ تونسيّـه = وسط العلم فيه الهـلال إحتواهـا
أوفا لهـا مثـل عنـزي لعنزيّـه = صادق يكحلّهـا ويـدرى عماهـا
أو شمرّي يومـه هـوى شمريّـه = يمشي معاها صدق يدمح خطاهـا
أو دوسري طاح بهوى دوسريّـه = جاهـا وفـا دام أعلنتلـه وفاهـا
يعني أجودي يحـبْ لـه أجوديّـه = من جنس حـوّا شافهـا وإنتقاهـا
وأنـا وكـل المفـردات البريّـه = مثـل النجـوم العاليـات بسماهـا
لغيـون طيـفٍ بالوفـا لاح ليّـه = له صـورةٍ رب الخلايـق وقاهـا
صورة عمر من فيه نفـسٍ سويّـه = ولا كل نفسٍ وصلّـت مستواهـا
ولد البخيت اللّي جـذوره رويّـه = اللّي حصيلة زرع طيبـه جناهـا
يفدونه أصحـاب العقـول الغبيّـه = اللّي تزايـد فـي زمانـي غباهـا
يومه صغير ولا يجـي الثانويّـه = نفسه من الله يـا جماعـه زكاهـا
يرهن شهادة يا عـرب مدرسيّـه = لعيـون مـن دنيـاه زادت بلاهـا
فارس وله يمنـى مـن الله قويّـه = كنّـه نياشيـن المهابـه رمـاهـا
حافظ وفا ربعـه مـن الأقدميّـه = وفـي لـزّام الجمـيـع يتبـاهـا
جابـه بقـدرة قـادرٍ مـن وليّـه = وعيال عمّـه بالوفـا مـا نساهـا
كنّه نهر يـروي المخاليـق ميّـه = عذبٍ جميع ديـار ربعـه سقاهـا
الصيرمي نفسـه معـه صيرميّـه = ما يضحك لنـاسٍ ويطعـن قفاهـا
صميـدعٍ مـا فيـه لمحـه دنيّـه = أهـل الدنائـه مبتعـد مـا دناهـا
ولا عاش جاهل وإشتكى العنصريّه = يفزع ونفسه مـا تعانـي بطاهـا
صِخيْ ولهيمنـى بوقتـه صخيّـه = يمشي بـأوّل طيبهـا مـا تلاهـا
كنّهـا بنـا لأمجادهـا قيصريّـه = لا باع بأفعالـه ولا هـو شراهـا
حكمه من الله فيـه نفـسٍ زكيّـه = مع فزعته ترسم ملامـح زكاهـا
مثل النحل لاصار يبنـي الخليّـه = خليّة أهـل الطيـب فعلـه بناهـا
كنْ المآسـي جانيـه فـي جِنيّـه = وكنّه حكمها وعـن عربنـا نفاهـا
يـا عيـال لام التمـر به سكريّـه = نلمح مع الفنجال روعـة حلاهـا
ونبي نتقهـوى مـن دْلالٍ عذيّـه = من فوق نارٍ باينـه فـي دجاهـا
مـن دلــةٍ كأنـهـا كربلـيّـه = من فوق نارٍ تشتعل مـن هواهـا
يا عيال لام وعـز ذكـر السميّـه = حيْ النفوس اللّي تزايـد صفاهـا
رحـنـا لِإنترنتّـنـا العالـمـيّـه = شفنـا رجـالٍ بيّـض الله ثناهـا
آل البـويّـت بانـيـن البـنـيّـه = في منتدى بإسم الفضـول يتباهـا
بإبـن العبيـدالله طـلال وسِريّـه = من عيلة السالـم وربّـي رعاهـا
زيـدٍ وعبـدالله لفـونـا لفـيّـه = لفيّـةٍ يـا زيـن ساعـة لقـاهـا
من الحسـا جونـا نفـوسٍ وفيّـه = لعيون مـن نـادى ولبّـى نداهـا
بعلوم وصل ومـا بهـا محسريّـه = يا حسـرة نفـوسٍ تزايـد غثاهـا
أقولها مـن نفـس حـرٍ جريّـه = شهـادةٍ لا خـيّـب الله رجـاهـا
يشهـد عليهـا الله مرسـل نبيّـه = يحمل رساله خالـقٍ لّـه وقاهـا
يا عمر لو دنيـاي تقسـى عليّـه = لعيونك أمشي ما حسبـت لشقاهـا
هاك العهد واجب مهـو موهبيّـه = كلمة شـرف يبعـد بعيـدٍ مداهـا
منّي ومـن ربعـك ورب البريّـه = كلمتْـك نمشـي لايذيـن بذراهـا
ماهـي غلـو لا لا ولا مفرطيّـه = خلْ الليالي وإعـز فينـا عزاهـا
وإنْ شذْ واحـد تكفـي الأغلبيّـه = كلمة نفوسٍ حـيْ شوفـة نباهـا
من دون شور ولا بقى مشوريّـه = من عقب شوفه مجد ربعك نحاهـا
ويامن تـدوّر مـا بقـي مدوريّـه = عمـر متاهـات الليالـي لغاهـا
جِمـع شظايانـا شظيّـه شظيّـه = من قنبلة مجـد وتزايـد شظاهـا
ليـن إجتمعنـا جمعـةٍ عايلـيّـه = وإسم الهنا من فضل ربّي علاهـا
يـا عيـال لام وأرضنـا دايريّـه = تدور حول الشمس ربـك رعاهـا
دار الزمـان ودورتـه عايـديّـه = وظروفنا عكس القسـاوه رخاهـا
والكل منّـا راعـي ولـه رعيّـه = ولكلٍ أسـرارٍ حشـا مـا فشاهـا
وكل بـدوّيٍ لـه طبـوع بدويّـه = متمسّـكٍ فيهـا ولاهـو سـلاهـا
ولعمر سلمٍ مـا يلاحـظ عِصيّـه = دنيـاه بأفعـال المهابـه كسـاهـا
لامن تنهّض والمصايـب سوّيـه = متساويتلـه جـور يلعـن ثواهـا
وإن لاحـظ الدنيـا بهـا مهلكيّـه = يرأف بها عن خوف يكسب خطاها
له وصف دام الوصف له قابليّـه = وصن المعاني وسط دورة رحاهـا
وصف النفوس اللّي بهـا ملهميّـه = وصف القلوب الطاهره في نجاها
وصف الصقور الحايمه بالفضيّـه = وصف الدروب الطيّبه لا سعاهـا
وصف الصدور اللّي بها موسعيّـه = وصف النفوس اللّي وجوده شفاها
وصف الشهامه والكرم والحميّـه = وصف الجروح الداميات ودواهـا
أنا أشهد إنـه لا لفـت معرضيّـه = تتعب عشيّة وقتهـا مـع ضحاهـا
يعني تجيـه الصبـح أو بالغديّـه = تندم عسـى لا سـدّد الله خُطاهـا
ما قلتها قصّـة غـزل مسرحيّـه = شفت الميادئ طير شلوى غزاهـا
ما قال كلمـه تنوصـف تمتميّـه = تشكيه دنيانـا وهـو مـا شكاهـا
ولو وقتنـا يُظلِـم يكفيّـه ضيّـه = ولو للظروف ذراع مبطي لواهـا
لا قلت إبن عـروّج قلهـا مليّـه = إنطق عمر شف كيف يسمو نداهـا
يالربـع مـا الأجـاويـد حـيّـه = لازم معالمهـا توّضـح حيـاهـا
والحـق مالـه يالبشـر معذريّـه = واللّي خلق للعين رمـشٍ غطاهـا
إن الشهـاده للـوفـا ملزمـيّـه = وإنّه ولـد لـزّام حامـي حماهـا
من نسل إبن عروّج نافي الأسيّـه = منهو يواسي نفس تشكـي أساهـا
وعمر لـو إن ظروفنـا قاهريّـه = يوقف لها وبراس روحـه كفاهـا
يا سامعي خذ ذيك أو هـاك ذيّـه = فتّح عمـى عيـنٍ تزايـد عماهـا
ما جيت أبي أجلس جلسةٍ ساحليّه = ولا جيت أعاند دنيتي من فضاهـا
جيتك وأنـا ويّـاك للحـق ديّـه = وعروق قلب الحق تسري دماهـا
بـس الوكـاد علومهـا كايـديّـه = واللي يخالف علـم كايـد كلاهـا
وكـل المواقـف قلتهـا واقعيّـه = واللّي رحم كـل العبـاد بدُعاهـا
يا عمر خذنا سيف ضـد الأذيّـه = وإضربّنا الدنيـا وزلـزل أذاهـا
ضربـة يديـنٍ كنّـهـا معدنـيّـه = من نفس يعميها الزعل عن خطاها
مـا ادم نفسـك بالمهابـه غنيّـه = والموت لو يقرب غـدى مبتغاهـا
ولا ترجي إلا الله وعـز الرجيّـه = رجيّةٍ يـا سعْـد منهـو رجاهـا
جيت بوفا ما جيت لـك مطلبيّـه = معالمـك عميـان عينـك قراهـا
كنّك إلى الطولات لـك قنصليّـه = ملجى لمنهو تـاه لامـن نصاهـا
كنّك معـك شجعـان بنـو أميّـه = تفز لمـن ينخـى ليامـن نخاهـا
يـا ربعنـا دام النوايـا خفـيّـه = كـلٍ ولـه نفـسٍ يطهّـر خفاهـا
وحنّا على النيّـه وتراهـا مطيّـه = يا عيال لام الروح طوّل ضماهـا
فينا الفضول نفـوس عـز ونقيّـه = والله يعلـم بالنـفـوس ونقـاهـا
وفينا من الكثـران طيـب الربيّـه = ونفوسنـا يشـرح رباهـا وفاهـا
وفينا المغيـره والعلـوم السخيّـه = اللّـي معالمهـا توّضـح سخاهـا
وحاضر عمر حمدان والملحميّـه = شوفة ذراه تْصـدْ عنهـا ذراهـا
عمر مع إنـك تجهـل العنجهيّـه = إصعد ترى مثلك يـروم لسماهـا
صـورة فعايلـك السخيّـه بهيّـه = أنت القصايد فيـك قامـت تباهـا
يا أبن البخيت إقبل سـلام وتحيّـه = لعيونك إبن هـلال أبعَـد مداهـا
يا عمر هاك إثنين وإضرب بميّـه = ميتين بيت وشاعـرك لـك بناها