[poem font="Simplified Arabic,6,darkred,bold,normal" bkcolor="transparent" bkimage="" border="none,medium,gray" type=2 line=1 align=center use=ex num="0,black"]
يانفس وشفيك طول الوقت مهتمه = كفي عن الهم كافي ما حصل كافي
وش لك بهم يسل الحال ويسمه = والرزق عند الكريم اشكال واصنافي
وانا على الله حبالي تاصل الجمه = واشرب من الما الزلال المنهل الصافي
مسلم واصلي صلات الله على اليمه = واسري على النور الابيض وارسم اهدافي
ياقايد الريم مافي ذا الزمن ذمه = والا انت ماصار منك قصور واخلافي
لكن ظروف الليالي جات بمطمه = والا انت وافي وعمرك دايم وافي
حلم تبعثر ولا ادري كيف بلمه = ما بين جور الزمان وحظي الجافي
وجدي توجد مجلا مهدر دمه = يقطع فجوج الفيافي والقدم حافي
حده زمانه على ذبحة ولد عمه = في ليلتن من قشرها نورها طافي
والا رضيع حرمه الوقت حضن امه = يمسي ويصبح بدون افراش والحافي
عليك ياللي تهد القلب وتخمه = خمة نشيط مثل ماقيل متعافي
يابوجديل يحس الارض وتضمه = يابلسم جروح روحي والشفا الشافي
اليوم من راح ما الد النظر يمه = ندور الستر من ستر الله الضافي
لولا اختلاف البشر والدين والذمه = ماشفت الايام فيها ظلم وانصافي
من ضري بالقاع مايستاهل القمه = والليل ليلين ذا بارد وذا دافي
اصرف الحرف بالهمزه وبالضمه = شاعر مع الوقت متفاهم ومتنافي‘‘[/poem]


كلمات الشاعر :: سلطان بن مسفر بن سعيدان