البارحه سرّا على الفكر هوجاس=سرابي الغزه وحيفا واريحه
ونويت اسوي لي بيوتٍ على ساس=في روضةٍ فيها كداده وشيحه
واخذة لي مع هجعة الناس مرواس=اشعب ذلولي والأوادم مريحه
أخم وأخطي بين مذهب وعسّاس=لين استبانت لي اسلوم القريحه
كنّي مابين الزير سالم وجسّاس=(ابن عباد).. اللي افعوله مديحه!
يابو هديف الوضع مزري وحسّاس=والله يبيح المخطي الله يبيحه
قلّه تراني ذخر (مارق وعفّاس)=عرضي مهوب المن بغى يستبيحه
ولا حدتك سود الليالي على الناس=جنّب عن (المترديه والنطيحه)!
اللي صداقتهم على بنك الأفلاس=شيكاتهم بالبخل الأسود صريحه
هذّارة المجلس او طباخة الفاس=عفون الرجال اهل الوجيه القبيحه
خدوش الرجال المستبدين الأنجاس=اطيبهم اللي كاسبٍ (والقميحه)
من دونهم حطيت للباب ترباس=ومن هاتفي غيّرت رقم الشريحه
مانيب لصحون المساكين لحّاس=اوحي واصد اعن العلوم الطفيحه
اخلّي الوسواس لو كان خنّاس= واجنّب ادروب الخزى والفضيحه
ادرى على عرضي والأيام درّاس=دام السوالف والمعاني مليحه
رفيقي اصعك راس راسٍ ولد راس=صداقته طب القلوب الجريحه
لي في طرف عرفه معزّه ونوماس=بين الرجال اهل الوجيه الفليحه
عرفه يسليني عن الهم والياس=سدّه ولو ضاق الفضى مايبيحه